Petrarch Laura Francesco Petrarch and Laura For a woman he would never know
For a woman he could never have
He should change the world forever
site map   contact  

  PETRARCH
  LAURA & OTHERS

  PICTURES
  WRITINGS
  BOOKS

  THE COLLECTION

  EVENTS
  PAPERS & ESSAYS
  MUSIC SETTINGS

  FAQs
  WEB LINKS
  SITE MAP

  CONTACT

Google


Search this Site
Search the Web



Bucolicum Carmen

Francesco Petrarca

Galathea

     Niobe 
     Duc, soror, ad tumulum gelidique ad saxa sepulcri. 
     Fusca 
     Quid lacrimis alimenta petis? Germana, quid optas? 
     Niobe 
     Est gemitus magni solamen grande doloris, 
     Afflictamque animam releuant suspiria, questus. 
5    Enecat arctatus mentem dolor; optima mesti 
     Pectoris est medicina palam lugere. Fuisset 
     Idem animus semper! Nunquam hec precordia torpor 
     Verteret in silicem; nocuit tacuisse dolenti. 
     Mitto autem; cupidam modo duc ubi copia flendi. 
     Fusca 
10   Carpe iter hac, qua, nodosis innexa capistris, 
     Colla boum, crebrasque canum sub limine paruo 
     Videris excubias, giluosque ad claustra molossos. 
     Ille locus tua damna tegit, iamque aspice contra: 
     Hic Galathea sita est, qua nil natura creauit 
15   Pulcrius in terris, nisi nos amor usque fefellit. 
     Depone hic quodcunque premit; complectere bustum; 
     Oscula fer saxis; umbre dic uerba silenti. 
     Niobe 
     Heu nimis arcta domus, tanto domus atra decori! 
     Hec sedes Galathea tibi est? Quam fulgere cernens, 
20   Sol stupuit, fassusque parem, fassusque subinde 
     Maiorem, attonitus serum se se abdidit undis. 
     Hec sedes Galathea tibi? Vos sidera celo 
     Statis? In occiduo ludis temone Boote? 
     Iupiter, ore poli lustras conuexa sereno? 
25   Is gelidus cum falce senex, armatus Orion? 
     Luna, uices peragis solitas, uolucerque deorum 
     Interpres, nomenque Venus positura uicissim? 
     Hic pallens, Galathea, iaces; iam terra cinisque, 
     Iam nichil! Etherea nisi forsan spiritus arce 
30   Visit, et inde uidet flentes tranquillus amicas. 
     Nil michi respondes, anime pars altera nostre, 
     Optima pars eadem? Dextras adhibete precanti, 
     Siqua fides mundo est, pietas seu prisca superstes. 
     Heu! Lapidem infestum, qua nunc, soror arte reuoluam? 
35   Irruam in amplexus, figam oscula; dulce cadauer 
     Hoc referam moribunda sinu, fotumque sacellis 
     Inferam et archanis diuum penetralibus abdam. 
     Addam perpetuos celebret quos mundus honores; 
     Virgineos addam cetus, ritusque uerendos 
40   Et sua sacra dee; nec fax nec carmina deerunt, 
     Femineas longe lateque sonantia laudes. 
     Heu michi predurum lapidem, graue pondus inersque! 
     Deficio sub fasce, soror, nitensque fatisco. 
     Fusca 
     Surge, soror, surge; sacrumque cadauere corpus 
45   Commaculare caue. Placeant presentia; frustra 
     Preteritum expectes; tuta est obliuio amanti. 
     Nempe hesterna dies ulla nequit arte reuerti; 
     Mors adimit curas, mors omnia uincla resoluit. 
     Niobe 
     Iam satis est fletum, nostros mors fregit amores. 
50   Fregissetque utinam nostros mors equa labores! 
     Speraui; prope nam steterat; miseramque fefellit. 
     Fusca 
     Viuo, sed infelix, et luctus seruor in omnes. 
     Parcius! En leuo tristis tibi Fulgida calle 
     Aduenit, et tacita castigat fronte querelas. 
     Fulgida 
55   Quid, misere ceceque animi, mortalia fletis 
     Tam grauiter? Quid fles, Niobe? Quin incipe uitam 
     Scire pati, quamcunque dedit sors dura dabitque. 
     Et me torquet amor, desiderioque meorum 
     Permoueor. Sed quid facias? Arma irrita calces 
60   Aduersus stimulum; melior patientia pressis; 
     Multa sibi facit ipse animus leuiora ferendo. 
     Quid gemitis? Moritura fuit Galathea; deinceps 
     Immortalis erit. Proprio tabescere damno 
     Non amor. Alterius sortem lugere secundam 
65   Inuidia est. Quantum nobis decesserit, omnes 
     Scimus, et ingrato quantum decesserit orbi; 
     Sed ferimus. Vos desinite, ac meliora tenentem 
     Suspicite, et celum terris optate relictis. 
     Fusca 
     Fabula! Quis alis celum terrestria prendent? 
     Fulgida 
70   Ethereis; sic terra suum, sic astra reposcunt. 
     Fusca 
     Credulitas uulgata quidem; nos certa probamus. 
     Fulgida 
     Fusca, locis imis habitas; nos summa tenemus, 
     Et celi terreque situm speculamur ab alto. 
     Fusca 
     Ambages ueteres et inenodabile uerum 
75   Mittite, et integram uenturis tradite litem. 
     Fulgida, quin potius (Musas nam noscis agrestes) 
     Dic titulum busto, relegat quem serior etas. 
     Fulgida 
     Hic liquit Galathea suum pulcherrima corpus; 
     Libera iamque polos et regia tecta tonantis 
80   Ipsa quidem superumque choros mensasque frequentat. 
     Mors roseos artus, mors candida colla genasque 
     Sidereosque oculos tetigit, uultusque serenos 
     Obscura demersit humo. Mortalia quisquam 
     Diligat, aut speret stabiles hic figere plantas? 
85   Quid genus, aut probitas? Quid opes? Quid forma? Quid etas? 
     Quidue decens cultus? Quid gloria nominis ingens? 
     Omnia contigerant; manus abstulit omnia mortis. 
     Nuda, domum repetens, e carcere fugit amato. 
     Niobe 
     Nuda quidem minime, quam gloria uestit, amictus 
90   Clarior assidue, longisque recentior annis. 
     Hanc quecunque sibi uultuque animoque per euum 
     Aut cantu aut sermone placens cupiensque placere, 
     Deferet ante oculos; hanc nos, dum spiritus iste 
     Artubus herebit miseris et uiuere coget; 
95   Hanc me, uel apud Manes nebulosaque flumina Lethes, 
     Exemplarque pudicitie formamque decoris 
     Corde sub hoc semper memori pietate feremus. 
     Tum nostro, Galathea, tuum de pectore nomen 
     Exibit, fugient propriis dum sedibus astra, 
100  Mellis apes studium linquent, nidosque columbe, 
     Coniugium turtur, predam lupus, arbuta capre, 
     Custodita dolos mulier, mendacia seruus. 
    
    


© Copyright 1999-2006
Peter Sadlon
Updated Sept 10th 2007

A Merentha Entertainment Project


PETRARCH LAURA PICTURES WRITINGS BOOKS EVENTS PAPERS SETTINGS FAQs CONTACT